०७ पौष २०८१, आइतबार
राज शाही बुधबार, साउन २७, २०७८ मा प्रकाशित
नाम्खा गाउँपालिका–५ को चाङला भञ्ज्याङमा रहेको नेपाल र चीनको सीमा स्तम्भ नम्बर ३ मा पहिलो पटक नेपाली सुरक्षा गस्ती पुगेको छ । सशस्त्र प्रहरी बल ४४ नम्बर गुल्मका प्रमुख सशस्त्र प्रहरी नायब उपरीक्षक गेहेन्द्र भण्डारी नेतृत्वको टोली उक्त सीमा स्तम्भमा पुग्न सफल भएको हो ।
स्थापना भएदेखि जिल्लाबाट हालसम्म सरकारी स्तरमा उक्त सीमा स्तम्भको अनुगमन भएको थिएन । डीएसपी भण्डारीको नेतृत्वमा ११ जना सशस्त्र प्रहरीका सुरक्षाकर्मी सीमा स्तम्भ अनुगमन गरी फर्किएको छ । नेपाल र चीनबीचको ३ नम्बर सीमा स्तम्भ सुरक्षित रूपमा रहेको उनले बताएका छन ।
गाडी जाने ठाउँसम्म गाडी र त्यसपछि तीन दिन पैदल हिँडेर ३ नम्बर सीमा स्तम्भसम्म पुगेको बताउँदै उनले पाँच हजार १०८ मिटर अग्लो स्थानमा रहेको सीमा स्तम्भमा पुग्न निकै कठिन रहेको बताएका छन । उनका अनुसार सीमा स्तम्भ पुग्ने क्रममा टोलीले कतै पाटन, कतै उकालो, भीरपाखा छिचोल्नु परेको थियो । टोलीले पाँच हजार दुई मिटर अग्लो स्थानसम्म चढ्नुपरेको थियो ।
सशस्त्रको हेडक्वाटर रहेको सदरमुकाम सिमकोटको ४४ नम्बर गुल्मबाट नाम्खा गाउँपालिकाको वडा नम्बर ५ को यारीसम्म कर्णाली करिडोरको सडक हुँदै गाडीमा पुगेको टोली पहिलो दिन उतै बास बस्नुपरेको थियो । सीमा स्तम्भ अनुगमनको जिम्मा पाएको टोलीले त्यसको पछिल्लो दिन नेम, ह्याङ्सी हुँदै घी खर्कमा दोस्रो बास बसेको थियो । तेस्रो दिन याङ्जो पोखरी, चिलिमे भञ्ज्याङस्थित ३ नम्बर सीमा स्तम्भमा पुग्न सफल भएको उनले बताएका छन । हिँड्ने बाटो नभएको अग्लो पाटनमा सुरक्षाकर्मीको हातमा रहेको जीपीएसका भरमा टोली स्तम्भको पहिचान गर्न सफल भएको हो । अक्सिजनको मात्रा कम भएकाले लेक लाग्ने उत्तिकै सम्भावनालाई समेत ध्यानमा राख्दै सुरक्षा गस्ती पुगेको थियो । उनले सीमा अनुगमन गरेर टोली सुरक्षित रूपमा फर्केको बताएका छन ।
हिउँले १०/११ महिना ढाक्ने सो क्षेत्रमा उपयुक्त समयमा गएका कारण सीमा स्तम्भको पहिचान गर्न सफल भएको हो । मानवबस्ती नभएको सो क्षेत्रमा टोलीले आफूलाई आवश्यक पर्ने सबै कुरा बोकेर सीमाको अनुगमनमा निस्कनुपरेको थियो । डीएसपी भण्डारीले आफ्नो टोलीले एउटा लक्ष्य पूरा गरेर हेडक्वाटर फर्केको बताउँदै अब हुम्ला खण्डमा पर्ने ४ नम्बर सीमा स्तम्भको पहिचान गर्न बाँकी रहेको बताउनुभयो । केही समयअघि सीमा सुरक्षा चौकी हिल्साको टोली ४ नम्बर सीमा स्तम्भको अनुगमन गर्न निस्केको भए पनि हिउँ नपग्लेका कारण सफल नभएको बताउनुभयो ।
अझै एक पटक उक्त स्तम्भको ठाउँ पहिचानका लागि हिल्साकै सुरक्षाकर्मी खटिने उहाँले बताउनुभयो । यो काम आगामी भदौ महिनाभित्र गर्न नसके अन्य महिनामा सीमा स्तम्भको पहिचान तथा अनुगमन गर्न सम्भव नहुने उहाँले बताउनुभयो । हुम्ला खण्डमा पर्ने नेपाल–चीनका सीमा स्तम्भहरूमा ३ देखि १२ नम्बरका १५ वटा सीमा स्तम्भ रहेका छन् । ४ नम्बरबाहेक बाँकी १४ वटै स्तम्भमा सुरक्षाकर्मी पुगिसकेको उहाँले बताउनुभयो । किटदेखि हिल्सा क्षेत्रमा पर्ने ५ देखि ९ नम्बरका सीमा स्तम्भहरू १ र २ गरी १० वटा रहेका छन् । बाँकी १० देखि १२ नम्बर सीमा स्तम्भहरू हिल्साको टाकुले भञ्ज्याङदेखि लिमीको लाप्चा क्षेत्रमा रहेका छन् ।
पुर्व मुख्य मन्त्री जिवनबहादुर शाहीद्धारा नव निर्मित शिवको मुर्ति उद्धघाटन
पुर्व मुख्य मन्त्री जीवनबहादुर शाहीलाई अदालतले सफाई दिएसंगै हुम्ला जिल्ला भर दिपावली
वाइडबडी भ्रष्टाचार मुद्दामा पूर्व पर्यटनमन्त्री शाहीले पाए सफाइ
